Изразуваме голема загриженост во однос на вознемирувачките информации изнесени во медиумите за препродажбата на лекови и оставање на болните од карцином без терапија на Клиниката за онкологија и радиотерапија, откако МВР и Основното јавно обвинителство (ОЈО) Скопје влегоа во оваа здравствена установа за да направат претрес во рамки на предистражната постапка поврзана со одземањето на терапиите за болни од рак и продавање на црниот пазар од страна на вработени во Клиниката.

Злоупотребите за кои слушаме се пораз на општествениот систем и значат повреда на правата на пациентите, но и непочитување на основните етички принципи во вршење на здравствената дејност, како и прекршување на основното човеково право на живот.

Секој од нас може да се најде во состојба да му е неопходна терапија за да си го продолжи животот. Недозволиво е повеќе да ни умираат децата, родителите, за некој неовластено да стекнува финансии. Секој човек е важен и има еднакво право на соодветен третман. Затоа повикуваме и на морална одговорност на менаџментот на Клиниката и кривична одговорност и јавно објавување на сторителите. Потребна е итна реорганизација на здравствениот систем и поставување на систем на индивидуална одговорност.

My даваме поддршка на Јавното обвинителство и другите органи и очекуваме што поскоро да се расчистат сомнежите, како и да се споделат со јавноста точни информации за тоа што се случувало на Клиниката за онкологија која е единствена здравствена установа од ваков тип и таму се лекуваат најголем број пациенти болни од рак.