Close

Либерално Демократска Партија

Month: November 2019

Валентин Груевски: Размислуваме различно

Валентин Груевски: Размислуваме различно

Трибината на Либерално-Демократската партија во полниот Битолски театар, во која и јас  членувам, ги размрда политичките кругови  во градот, изненади многумина, наведе на размислувања зошто се случува токму сега, покажа одредени трендови и добро ја раздрма заспаната политичка сцена. Изненадени беа многумина, само ние знаевме дека само ги бериме плодовите од нашата макотрпна работа.

И покрај многуте сомнежи, потценувања и подбуцнувања во изминатиот период, како либерал-демократи докажавме дека во Битола сме убедливо третата најсилна политичка опција, дека имаме поддршка меѓу граѓаните и дека за нашите идеи имаме респектабилен број на гласачи.

Организацијата на целиот настан, идеите кои беа пласирани, разновидноста на дискутантите, храброста отворено да се зборува за проблемите кои ги имаме како власт и маните кои ги практикуваме, само го потврди нашиот либерализам, слободата, и нашата демократичност. Сакаме и знаеме да критикуваме, ама сме спремни да прифатиме критика и да се поправаме, и тоа секојдневно.

ВО МИНАТОТО
Знаевме жестоко да се спротивставиме на владеењето на Талески, иако можевме и многу „поубаво“ да си поминеме. Го препознавме лажниот локал патриотизам, популизмот, лошото владеење. Бевме против приватниот паркинг, против покачувањето на цената на водата и ѓубрето, не ги гласавме новите имиња на улиците, први ја отворивме темата за загадениот воздух и први предупредивме за неговата смртност, го спречивме да купи кола од  илјадници евра, а да потсетам дека и не го гласавме сегашниот грб на Битола, сметавме дека нема ништо заедничко со Битола.

При крајот на мандатот на екс градоначалникот се накотија многу „борци“ за слобода, ама тоа го направија, откако искористија се што можеше да се искористи од претходната власт, си преспаја 10 години во своите ,,пештери“, и се излактија да стигнат во првите редови на оваа власт. За жал, добија и високи функции, ама за тоа и не се виновни.

ДЕНЕС
Сме дел од локалната власт и нема бегање од одговорност. Меѓутоа, како и во минатото, така и сега, ЛДП докажува дека знае да раководи со институциите кои и се дадени. Можеби не се доволни за нашиот капацитет, меѓутоа чесност, храброст, достоинство, знаење е карактеристика на сите наши раководители. Производство на сопствена електрична енергија во Пазари, нови машини, нови уредени градинки, нов начин на греење, нов ентериер, ново осветлување.

Учествуваме во обновата на Офицерски, во изградбата на стадионот, на пречистителната станица на Пелистер, на изградбата во Касарната, во реконструкцијата на Пазарот, Обиколницата, Полигонот, Детскиот парк,  Спортската сала, патишта и многу други работи во градот.

ВО ИДНИНА
Никој нема да ја има бланко поддршката од ЛДП. На трибината отворено зборувавме за некои слабости, а и во иднина тоа ќе го правиме. Само тоа мислиме дека е вистинскиот пат кон демократијата и подобра власт. Отворени сме за помош ама и за критика секаде каде што грешиме. Имаме доблест да прифатиме секаква критика. Затоа и размислуваме различно.

П.С. Вториот дел од слоганот на трибината, Либерално кон Европа произлегува од нашите цврсти уверувања дека, само таму и никаде на друго место е патот на Македонија. И покрај проблемите кои ги имаме во овој момент, ЛДП заедно со своите европски пријатели од АЛДЕ групацијата која е сега трета политичка сила во Европскиот парламент и има неколку европски премиери, размислува за Европа, размислува за човекови права, за дискриминација, за либерален пазар, за рамни даноци, за рамноправност, за правата на маргинализираните групи.    

Пишува: Валентин Груевски, претседател на Советот на Општина Битола и член на Извршниот одбор на ЛДП

7-мо Собрание на ОО на ЛДП Битола

7-мо Собрание на ОО на ЛДП Битола

На 24.11.2019 година (недела), во просториите на стариот народен театар во Битола, со почеток во 13:00 часот, се оддржа 7-то годишно изборно Собрание на Општинската организација на ЛДП – Битола.

Пред самиот почеток на Собранието беше одржана и голема трибина под мотото “Размислувај различно“ во присуство на над 450 гости. По завршувањето на трибината, делегатите продолжија со работа предвидена со Дневниот ред за Собранието.

Присутните делегати, меѓу другото, имаа можност да расправаат по предлог-извештајот за работата на Општинската организација помеѓу двете Собранија.

Исто така, расправаа и ги усвоија и предлог-правците за работа на општинската организација во наредниот период.

На 7- то Собрание на Општинската организација на ЛДП Битола, присуствуваа 120 делегати кои гласаа и за нов состав на Општинскиот одбор на Општинската организација кој во престојниот четиригодишен мандат ќе ја води Општинската организација и кој во наредниот период ќе брои 40 члена, како и за нов состав на Надзорниот одбор составен од 5 члена.

Александар Касапов е реизбран за Претседател на ОО на ЛДП Битола .

Дел од атмосферата на Собранието можете да проследите низ фотографиите во прилог.



ЛДП ќе бара првото поглавје кое ќе се отвори во пристапните разговори со ЕУ да биде за екологија.

ЛДП ќе бара првото поглавје кое ќе се отвори во пристапните разговори со ЕУ да биде за екологија.

На трибината во Битола „Размислувај различно, либерално кон Европа”, лидерот на ЛДП и министер за локална самоуправа Горан Милевски нагласи дека отворањето на поглавјето за екологија ќе овозможи побрзо отворање на ЕУ-фондовите за екологија.

„Документот што Франција го нуди за пристапни преговори, поглавјата како важен сегмент и фондовите содржани во соодветното поглавје овозможуваат, и затоа ние како партија ќе предложиме, нашата држава да инсистира, а тоа ќе го бараме и од Европската Унија, првото поглавје што треба да се отвори со Република Северна Македонија да биде поглавјето за екологија. Ние сметаме дека час поскоро треба да се отворат фондовите во оваа област. Екологијата е тема и проблем за кој сите треба да се заложиме, тој проблем со сопствени средства не можеме да го решиме и затоа потребни се европските фондови“ истакна Милевски.

Во делот на битката со загадувањето Милевски вели дека Битола треба да има јавно претпријатие за топлификација, како би можел дел од градот да се грее на топлинска енергија, дел на гасификацијата, а онаму каде што нема да може ниту едното, ниту другото, таму да се дадат инвентор клими.

Милевски на денешната трибина во Битола зборуваше и за идејата за изградба на покриен базен во Битола, за која како што рече веќе разговарале со ЕСМ, но истакна дека општината нема проект за тоа.

Претседателот на Советот на општина Битола Валентин Груевски реферираше што се  направиле како локална власта заедно со СДСМ и коалиционите партнери, но рече дека и треба да бидат самокритични, наведувајќи дека некои работи се движат многу споро, заради одредени бирократски работи.

Груевски ги наброи успесите на ЈП „Пазари“, првото јавно претпријатие кое ќе произведува електрична енергија за свои потреби, и ги покачи платите за 8%. ЈП „Нискоградба“ кое ги врати долговите на претходниците од 500.000 евра, и ги покачи платите за 6%, а се осврна и на вложувањата во градинката „Мајски цвет“ од над 150.000 евра. Обновени тоалети, шкафчиња, клима уреди, нови теписони, нови играчки, нови кујни.

Но, иако ЛДП е дел од централната и локалната власт Груевски со критики предупреди на слабостите и на состојбите во кои треба да се подобрат.

„Ако се завршиме само со фалби и убави работи, тогаш нема да бидеме различни. Ама ние сме различни и размислуваме различно и си ги признаваме грешките. Мислам дека во овој период и централната и локалната власт мораа да бидат малку побрзи и поодлучни во донесувањето на некои одлуки. Премногу сме спори во донесувањето на одлуките. Администрацијата ни е преспора, ги малтретираме граѓаните со непотребни процедури. Недозволиво е ако законскиот рок е 10 дена, да добиете одговор после 25 дена. Ни треба многу повеќе храброст, ни треба фантазија во управувањето, ни треба нешто различно од досегашното, да вклучиме повеќе млади луѓе, кои ќе носат одлуки, а не да бидат обични писари. Надменост, ароганција, лажни големини, инает, суети кои реално ги има под итно треба да се остават дома. Треба да разбереме дека сите сме во функција на граѓаните , а не се граѓаните во наша функција. Или по онаа народната „Анџија и меанџија пак ќе се сретнат“, рече Груевски на  трибината во Битола.

На трибината зборуваше и Зоран Шапуриќ директор на инспекторатот за земјоделие, кој се осврна на некогаш започнатиот колекторски систем на Пелистер, кој се градел со странски пари, но дека потоа тој проект се стопирал, а вели дека е време работите да продолжат, за да се обезбеди чиста животна средина.

Пред присутните се обрати и пратеничката Јулијана Николовска која рече дека мора да се работи на подобар образовен систем, за да имаме компетитивни млади луѓе кога ќе излезат на пазарот на трудот да си најдат работа.

Аврамовска-Ѓореска: Жените во ЛДП не сакаат да бидат само квота, тие се борат за придонес со квалитет

Аврамовска-Ѓореска: Жените во ЛДП не сакаат да бидат само квота, тие се борат за придонес со квалитет

Жените не се бројка туку се наш квалитет, заклучија учесниците на Петтото Собрание на Форум на жени на Либерално-демократската партија што се одржа во Скопје.

Пратеничката од македонското собрание и потпретседателка на ЛДП, Јулиана Николова преседаваше со Форумот. Таа потенцира дека изминатиот период заеднички работеле на интензивна едукација, во која е вложено многу труд, во соработка со меѓународните организации FNF, ALDE, VVD, Liberal International, NDI, со цивилниот сектор од нашата земја, како и со огромна поддршка на машките колеги.

„Во изминатиот период постигнавме многу. На последните парламентарни избори, три од пет кандидати за пратеници беа жени. Од три пратеници кои влегоа во Собранието, две се жени. Речиси 50% од советниците на ЛДП во општинските совети се жени. Морам да истакнам и дека од четири потпретседатели во партијата, две сме жени. Сигурна сум дека новото раководство ќе биде уште поуспешно, дека жените и понатаму ќе бидат еден од главните столбови во партијата и дека и жените ќе имаат одговорни функции, не поради квоти, туку поради квалитетот и исполнителноста“ истакна Николова.

Додаде дека од позицијата на потпретседателка на партијата, останува посветена на родовата еднаквост и учеството на жени во политика. Таа се заблагодари на целиот тим, сите жени на ЛДП кои несебично го дадоа својот придонес во сите политички и партиски активности, за сите посветени моменти на работа но и незаборавни дружења и трајни пријателства. Посака успех на новата претседателка на Форум на жени на ЛДП, Билјана Аврамовска Ѓореска.

„Кога ја поднесов кандидатурата ме следеше силна емоција за мојата поврзаност со ЛДП цели 22 години партиски ангажман, буквално пораснав со ЛДП, созреав во политичка личност и така сакам да остарам. Пред вас стои жена, мајка, сопруга, пријателка, либералдемократка која цврсто верува дека во жената се наоѓа моќта да создава, да се грижи и да менува. Жените во ЛДП секогаш размислуваат различно, со аргументирани ставови. Затоа, како претседателка сакам сите заедно да постигнеме зголемување на жените во извршната власт, почитување на индивидуата, да ја шириме мисијата и визијата за просперитетна држава. Буквално, сакам жената да остави траен историски печат во општеството преку политичкото дејствување“ истакна Билјана Аврамовска Ѓореска, новата претседателка на Форум на жени на ЛДП.

Честитки за новата претседателка дојдоа и од врвот на партијата, претстедателот на партијата, Горан Милевски и останатите, потпретседателката Моника Зајкова, како и потпретседателите Зоран Шапуриќ и Игор Вељаноски.

„Особено сум горд на жените во партијата, честитки за новоизбраната претседателка на Форум на жени на ЛДП. Сакам да потенцирам дека продолжуваме да се бориме заедно со жените, тие константно се движечка сила, сите заедно размислуваме различно и овој период интезивно носиме резолуции и одлуки за либералните вредности кои итаат кон патот до ЕУ“ додаде Милевски.

Редовно изборно Собрание на ОО на ЛДП Карпош

Редовно изборно Собрание на ОО на ЛДП Карпош

На 21.11.2019 година (четврток), во простоиите на х. “Карпош“, со почеток во 19:00 часот, се оддржа 5-то годишно изборно Собрание на Општинската организација на ЛДП – Карпош.

Присутните делегати, меѓу другото, имаа можност да расправаат по предлог-извештајот за работата на Општинската организација помеѓу двете Собранија, кој потоа беше и едногласно.

Исто така, имаа можност и да ги слушнат плановите на работа на општинската организација во наредниот период.
На седницата на Собранието присутните делагати гласаа и за нов состав на Општинскиот одбор на Општинската организација кој во престојниот четиригодишен мандат ќе ја води Општинската организација и кој во наредниот период ќе брои 17 члена.

Дел од атмосферата на Собранието можете да проследите низ фотографиите во прилог.

ЛДП и ЛиДеМ, учесници на Алумни од Регионалната либерална политичка академија (РЛПА)

ЛДП и ЛиДеМ, учесници на Алумни од Регионалната либерална политичка академија (РЛПА)

Во период од 17 до 22 ноември 2019 година во Брисел, Белгија, членовите на Либерално Демократската Младина вклучително со претседателот на ЛиДеМ Димитар Ванчов и поптретседателката на ЛДП Моника Зајкова, имаа можност да учествуваат на Алумни од Регионалната либерална политичка академија (РЛПА).
Учесниците имаа можност да ги посетат канцелариите на ALDE и LYMEC и да разговараат за можностите за вмрежување на младите од Западен Балкан.
Во рамки на Академијата се изработи резолуција насловена како “И ние сме Европа”. Интенција на резолуцијата е да се испрати порака за важноста од интеграција во Европската Унија на земјите од Западен Балкан со посебен осврт на младите луѓе.
Предлог резолуцијата беше презентирана на панел дискусија во Европскиот Парламент пред Европратениците од ALDE, Илхан Ќучук, Каталин Цех и Свенија Хан.
кои  дадоа позитивни мислења со целосна поддршка за предлагање на истата на следниот конгрес на LYMEC, кој ќе се оддржи во Скопје од 3-5 април 2020 година.
Членовите на ЛиДеМ остварија и средба во просториите на Македонската мисија во ЕУ со Амбасадорката Агнеза Руси Поповска, каде што имаа можност да разговараат за европските можности и пердпективи на младите луѓе од  нашата државата.
Сите овие активности се во склоп и корелација со програмските определби и стратешки приоритети на ЛиДеМ. ЛиДеМ се залага за интеграција на нашата држава во ЕУ поради тоа што сите луѓе, посебно младите би имале огромни бенефити од членството во европското семејство.

СЈАЈОТ против бедата или БИТОЛА против (не)битола

СЈАЈОТ против бедата или БИТОЛА против (не)битола

Сте ние кои живееме овде, а и сите кои заминаа надвор, се горди на родниот град. Кажуваат дека имаат прекрасен Широк Сокак, убав Пелистер, супер Шеталиште, многу клавири, конзулати, гостопримство, дека градот има душа или да се послужам со еден графит кој во еден период беше напишан на Широк Сокак, „Битола е градот“.
Претходниот викенд една манифестација го потврди се она погоре напишано, ама и еден настан не врати во реалноста, не врати во нашето самоуништување, во  образованието, во домашното воспитување,  даде повод да размислување, каде одиме и каде се движиме. Се судрија две Битоли, два концепта, две визии.

Музика од Светот или СЈАЈОТ или БИТОЛА
Три вечери Битола во Центарот за култура  личеше на она што сите сакаме да го видиме. На она што сите сакаме да го почувствуваме, на вистинска метропола. Организацијата на Центарот  одлична, атрактивни гости, Томашевиќ извонредна , Агушеви  и Хели Сиекинен супер, битолскиот Камерен оркестар 5+, Благојче како и секогаш маестрален, публиката фантастична и гладна за врвни музички настани, со една реченица Битола каква што треба да биде и каква што ја личи.

По завршувањето на секоја вечер, се гледаше дека луѓето се задоволни од она што го виделе, дека ќе дојдат и наредната вечер, дека ќе дојдат и догодина. Впечатокот дека поминале прекрасна вечер се гледаше на лицата на сите, беше лесно препознатливо и забележително.
Никој и не сакаше да оди дома, бисот задолжителен, Битола  во полн сјај.

Уништениот парк или бедата или (не)битола
На само неколку стотина метра растојание од Центарот за култура, на штотуку изградениот детски парк, најверојатно во исто време, некој се изживуваше. Не поминаа два дена, а некој почувствува потреба да расипе нешто, да исчкрта, да уништи.
И го добивате чувството дека за некој дно нема, дека дното е само замислено и некој успева и од најдолното да оди уште надолу.

Некој срушил реквизити, испишал клупи и делови од опремата со графити и си го потпишал своето име или прекар. Не знам што добил со тоа, сигурно бил ,,најјак“ меѓу своите другари, бил ѕвезда таа вечер, бил нај ,,мангуп“, можеби и берел ,,поени“. А паркот, се уште не е официјално пуштен, а во близина стои и табла дека има видео надзор.
Можеби и сето ова е поправливо, ама бедата која се практикува е непоправлива и нема лесно да се поправи. Затаиле тука и домашните, и наставниците, и целото општество кое успеало да израсне луѓе кои ова можат да го направат.
Секакви зборови на револт се изначитав овие денови за овој случај, а кој и да го употребите нема да згрешите, дури и неколку заедно.

Беда, Срамота, Дно, Ужас, Бљак, Идиотизам, Несовест, Криминал.
Првата Битола треба да е нашиот предизвик, тоа треба да е целта кон која ќе се стремиме. Сјајна, убава, расположена, весела.
Втората бедна, жална, грда, самоуништувачка, депримирачка.
Неа треба да ја поразиме!

Пишува: Валентин Груевски, претседател на Советот на Општина Битола

М-р Ивица Тодоровски, директор на УХМР, на Конференција на национални хидрометеоролошки служби.

М-р Ивица Тодоровски, директор на УХМР, на Конференција на национални хидрометеоролошки служби.

М-р Ивица Тодоровски, директор на Управата за Хидрометеоролошки работи на Република Северна Македонија, како досегашен Претседател на КОНФЕРЕНЦИЈА НА ДИРЕКТОРИ НА НАЦИОНАЛНИ ХИДРОМЕТЕОРОЛОШКИ СЛУЖБИ ОД ЈУГОИСТОЧНА ЕВРОПА (ICSEED-18), со поздравен говор го отвори состанокот, ги информираше присутните за активностите на УХМР во измината година.
Потоа, Претседателството со Конференција го предаде на Директорот на Израелската Метеоролошка служба, г-дин Нир Став.
Покрај излагањето на Директорите за напредокот на своите национални Хидрометеоролошки служби една од темите на конференцијата беше размена на хидролошки и метеоролошки податоци, информации, предвидувања и предупредувања во рамките на ВТОРАТА ФАЗА НА ПРОЕКТОТ ЗА ВОСПОСТАВУВАЊЕ НА СИСТЕМ ЗА РАНА НАЈАВА НА НЕПОГОДИ ВО ЈУГОИСТОЧНА ЕВРОПА (SEE-MHEWS-A).
.
https://public.wmo.int/…/data-exchange-improves-early-warni…

Ние сме ветерницата што ги движи работите напред, либерално кон Европа

Ние сме ветерницата што ги движи работите напред, либерално кон Европа

ЛДП од трибината во Центар:

Позитивни промени во општеството и исполнувања на сите поглавја на ЕУ за нашата земја беа
главните теми за кои се дискутираа пред членовите на втората граѓанска трибина на ЛДП,
„Размислувај различно, либерално кон Европа“ во Даре Џамбаз во Скопје.
На трибината на сите учесници добредојде им посака Андреј Јосифовски, претседателот на
општинската организација на ЛДП од Центар како и специјалниот гостин од Словенија, Роман
Јакиќ, политичар и претседател на LIВSEEN којшто на сите им порача дека Македонија не е
сама во Европа.
„Во Европа не сте сами, не е Европа само Франција, туку Европа се 28 самостојни и суверени
држави која одлучуваат сами, но сепак под чадорот на ЕУ. Морам да ви кажам дека, лично јас,
како словенечки политичар заедно со моите колеги од останатите 27 држави, бевме шокирани
кога чувме дека Македонија не може да ги започне преговорите со ЕУ“ вели политичарот
Јакиќ.
„Иновативна Европа, хакатон за безбедноста“ е конференцијата која се организира во
Македонија за аспирациите на земјата во НАТО под палка на др. Рajнер Адам директор на
Фондација Фридрих Науман за ЈИЕ кој на трибината рече:
„Ние како Либерална партија многу силно го подржуваме членството на Северна Македонија
во ЕУ и НАТО, токму тоа го имаме документирано во нашите одлуки во партијата. Можеме да
кажеме дека не сме многу среќни што вашата земја имаше француско вето и со тоа беше
одбиена за преговорите со ЕУ“.
Да не гледаме црно и бело поточно само лево или десно, потребна е шареноликост во
политиката, да се обидат за младите кои ќе останат во земјата сите да им се даде еднаква
шанса порача потпретседателката на партијата, Моника Зајкова.
„Кога имаме време кога треба да се случуваат промени, едните дигаат ѕидови други градат
ветерници, ЛДП е онаа која ќе ги гради ветерниците на различни размислувања. Треба да
престанеме со голиот популизам и лажните ветувања, на пример ќе ги вратиме младите, ќе
направиме ветинг, туку сите да изградиме една држава која размислува различно и која што
нуди еднакви права за сите но и правичност за сите пред законот“ потенцираше Зајкова.
Емил Кирјас, потпретседател на Либералната Интернационална, пред присутните повтори дека
било шокантно за сите политичари дека Франција во последен момент го променила ставот за
да даде зелено светло за Македонија во ЕУ. Тој потенцираше дека треба сите заедно да сме
сплотени и заедно да градиме подобро општесто.
„Верувам и убеден сум дека имаме капацитет и сакам да ве охрабрам да не се откажувате туку
секоја пречка што ќе застане пред вас како личности и пред нас, како партија и како држава да
ја гледаме како предност која што ќе ни овозможи да бидеме посилни и помоќни, мали сме
ама сплотени можеме. Во Европа ќе не сакаат ако влеземе со сопствен став. ЛДП има сопствен
став, да не се срамиме и да размислуваме да го кажеме гласно“ нагласи Кирјас.
Претседателот на партијата, Горан Милевски, рече дека ЛДП се залага за подобра иднина на
граѓаните како и до сега, покрај многубројните проблеми со кои се соочуваме сите во
моментот еден од најактуелните и значајни проблемие е решавање на проблемот со
загадувањето. Според него најважно е да го најдеме и спречиме причинителот за загадување
на воздухот во Скопје и целата држава.
„Не може 30 години наназад сите да се чудиме од каде е изворот на загадување на Скопје,
сите да се жалиме дека во Скопје не се дише, а никој не презема мерки тоа да се промени.
Една од нашите заложби е да се детекриаат проблемите, државата да оддели средства, да
помогне во поддршката на луѓето кои живеат во урбаните средини за поквалитетен живот“
истакна претседателот Милевски.
Во следниот период Либерално-демократска партија низ Македонија ќе организира трибини
на кои пред своите членови ќе ги потенцира своите либерални вредности и ќе ги натера
граѓаните да размислуваат различно и да ги споделат своите ставови.

ЛДП од Штип стартуваше со трибините „Размислувај различно”

ЛДП од Штип стартуваше со трибините „Размислувај различно”

Либералано-демократската партија вчеравечер од Штип ги почна трибините „Размислувај различно” на кои со граѓаните и членството се разговара и се презентираа различните ставови и од ВМРО-ДПМНЕ и од СДСМ.
Претседателот на ЛДП, Горан Милевски истакна дека тие се трета опција во земјава и имаат принципелни ставови.
“…Целта ни е да ги презентираме нашите ставови од економијата, на пример ние бевме против прогресивниот данок, сега се виде дека сите останати се вратија на рамниот данок, како политика којашто ја задржавме од 1998 година, се боревме за неа и имавме принципелни ставови. Ние се бориме за малите бизниси, за приватниот капитал, претприемачите, а не за крупниот капитал, за него во светот се борат демохристијаните, социјадемократите се борат за социјалните, работничките права…“
Тој исто така истакна дека на трибините ќе опфатат и многу табу теми за државата, какошто се легализацијата на марихуаната, превработеноста во јавната админситрација, ограничување на бројот во администрацијата и насочување на парите кон приватниот сектор.
“…Значи се она што големите не сакаат да го истакнат, бидејќи се плашат да не го разочараат гласачкото тело. Ние сме тука да предочиме без популизам, реално да ги согледаме сите аспекти на животната средина, мерките коишто треба да се преземат…“, рече Милевски.
Претседателот на ЛДП порача дека тие како партија се залагаат за една изборна единица.
“…Тоа е реално, тука е и нашата пратеничка, којашто е дел од потпишаните 16 пратеници, коишто достваија предлог до Собранието. Сега на ред се пратениците да се изјаснат дали се за, ја поддржуваат оваа иницијатива, а за тоа треба само 61 пратеник. Мислам по моите математики дека 64 или 65 пратеници се спремни да го дадат гласот за една изборна единица…“
Забележа дека по ова прашање партиите треба да имаат консензус, затоа што како што рече, утре ако на власт дојде друга политичка опција може да направи друг модел без да ги консултира останатите партии.
“…Затоа сме за консензус, меѓутоа доколку тој консензус е на штета на демократијата и на демокртаскиот развој треба еднаш да се пресечи и да се ослободи Македонија од влијанието на лидерот во партијата, којшто потоа се рефлектира и на државно ниво и велиме дека има заробена држава, односно тоа е токму поаѓа од големата моќ, којашто ја има лидерот, којашто би се нарушила, ако особено има отворени листи на изборите. Доколку нема простор за една изборна единица, ние се залагаме да се задржат постојните шест изборни единици, но да има отворени листи…“, рече Милевски.
Смета дека на овој начин самите граѓани од градовите и од изборните единици ќе ги формираат листите, а не лидерот на партијата. На овој начин ќе се види и кој ја има поддршката за да се најде на листите. Милевски којшто е и актуелен министер за локална самоуправа на новинарско прашање за објавените огласи од страна на државни институции, министерства, општини и агенции вели дека во одредени институции поради заминување на вработени во пензија или странство не можат да функционираат, а во други пак институции има превработеност.
-Затоа треба да се направи еден пресек и анализа каде имаме превработеност, а каде има недостаток на кадри, па можеме да направиме прераспределба, на нас не ни е важно дали ќе има оглас или ќе преземеме од друга институција. Секој да биде функционален на местото, каде што работи. Општините мислиме дека треба да се ограничи бројот, секоја општина да се знае колку може да вработува, па ако некој оди во пензија или замине по било која основа од работа неговото место да се пополни со друг, рече Милевски.
Тој очекува од буџетот за 2020 година да бидат распределени 450 милиони денари за проекти кон општините, односно осумте плански региони  преку Програмата за рамномерен регионален развој. Се надева дека општините ќе го следат примерот на Штип, којашто со средства од оваа програма, но и со сопствени средства гради детска градинка, а не да се насочат кон помали проекти или кон купување на нови автомобили и вработувања.

извор: fokus.mk